အသွားအလာကန့်သတ်တဲ့ မြို့နယ်တချို့မှာ ဒေသခံတွေ အခက်အခဲနဲ့ရင်ဆိုင်ရ

ရန်ကုန်တိုင်းမှာ ကိုရိုနာဗိုင်းရပ်စ် အတည်ပြုလူနာ များလာတာကြောင့် နေအိမ်မှာပဲ နေထိုင်ကြရေး အစီအစဉ်မှာ ထည့်သွင်းလိုက်တဲ့ မြို့နယ် ၁၀ မြို့နယ်မှာ အဝင်အထွက် ပိတ်ဆို့တာတွေကြောင့် သွားလာရေးနဲ့ စားသောက်ရေး မှာ အခက်အခဲတွေနဲ့ ကြုံနေရပါတယ်။မြန်မာနိုင်ငံမှာ ဒီနေ့ ဧပြီ ၂၉ ရက် မနက်အထိ အတည်ပြုလူနာ အယောက် ၁၅၀ ရှိနေပြီး အဲဒီထဲမှာ ရန်ကုန်တိုင်း က ၁၁၆ ယောက် ပါဝင်တဲ့အတွက် အရေအတွက် အများဆုံးဖြစ်ပါတယ်။

အဲဒီလိုတွေ့ရှိခဲ့တဲ့ ရန်ကုန် ၂၆ မြို့နယ်ထဲက လူနာအများဆုံး ၁ဝ မြို့နယ်ဖြစ်တဲ့ တောင်ဥက္ကလာ၊ ပန်းဘဲတန်း၊ ဗဟန်း၊ မရမ်းကုန်း ၊ အင်းစိန်၊ ရွှေပြည်သာ၊ လှိုင်သာယာ၊ မင်္ဂလာဒုံ၊ တာမွေနဲ့ ဗိုလ်တထောင်တို့ကို အသွားအလာ ကန့်သတ်ပိတ်ဆို့တဲ့အမိန့် အစိုးရကထုတ်ပြန်ပြီး ပိုးကူးစက်ပြန့်ပွားမှု ကာကွယ်ထိန်းချုပ်နေပါတယ်။ ရပ်ကွက်တချို့မှာ လမ်းတွေကို လုံးဝပိတ်လိုက်တာ၊ ပြင်ပကနေ အစားအသောက် လာပို့တာတွေကိုတောင် အဝင်မခံတာ၊ အခြားရပ်ကွက်ကလူတွေကို အဝင်မခံတာမျိုးတွေကြောင့် ရပ်ကွက်နေပြည်သူတွေ အခက်အခဲဖြစ်နေပါတယ်။

တာမွေမြို့နယ်မှာနေထိုင်တဲ့ ကိုသက်ဆွေဝင်းက သူတို့ဆီမှာ အလားတူ ရင်ဆိုင်နေတယ်လို့ ပြောပါတယ်။ လမ်းထဲဝင်ထွက်ဖို့ ဝင်ပေါက်တခုပဲ ဖွင့်ထားတဲ့ တာမွေမြို့နယ် ဗျိုင်းကွက်သစ်ရပ်ကွက်ထဲက လမ်းတစ်လမ်းမှာ ဆိုရင် အဲဒီဝင်ပေါက်မှာ လူတွေ တခါတရံ စုပြုံနေတတ်တာကြောင့် ပိုးကူးစက်ဖို့ လွယ်ကူတဲ့အခြေအနေ ဖြစ်နေတယ်လို့ ရပ်ကွက်နေထိုင်သူတစ်ဦးက ထောက်ပြပါတယ်။ တာမွေမြို့နယ် အထွေထွေအုပ်ချုပ်ရေးမှူး ဦးအောင်ကျော်အေးက မြို့နယ်ထဲမှာ လမ်းပိတ်ဆို့တာ မရှိဘူးလို့ ငြင်းဆိုပါတယ်။ မြို့နယ်အတွင်း နေထိုင်သူတွေကတော့ ရပ်ကွက်တွေထဲမှာ လမ်းပိတ်ဆို့ထားတာတွေကြောင့် အခက်တွေ့နေရပါတယ်။

တာမွေမြို့နယ် ပြည့်သူကွန်ရက် ဖေ့စ်ဘွတ်လူမှုကွန်ရက်စာမျက်နှာမှာဆိုရင် လမ်းတွေပိတ်တာ၊ ရေသန့် အပါအဝင် စားသောက်ကုန်တွေ လာပို့တဲ့လူတွေကို အဝင်မခံတာ၊ အပြင်ကနေ လာသူတွေကို ပေးမဝင်တာ၊ ရပ်ကွက်တစ်ခုကနေ နောက်ရပ်ကွက်ထဲ အိမ်ပြောင်းတာကို ထောက်ခံစာတွေ တောင်းတာကြောင့် အခက် အခဲဖြစ်တာ စတဲ့ မကျေနပ်တာတွေ ရေးသားထားတာ တွေ့ရပါတယ်။ အခုလိုလမ်းပိတ်တာတွေဟာ အုပ်ချုပ်ရေးမှူးတွေ နားလည်မှုလွဲပြီး ဆောင်ရွက်နေတာကြောင့် ပြန်ဖွင့်နိုင်ကြဖို့ စီစဉ်နေတယ်လို့ တာမွေမြို့နယ် တိုင်းဒေသကြီးလွှတ်တော်ကိုယ်စားလှယ် ဦးသိန်းမြင့်က ပြောပါတယ်။ မြို့နယ်အထွေထွေအုပ်ချုပ်ရေးဦးစီးဌာနက ညွှန်ကြားချက်ထဲမှာ လမ်းပိတ်ဆို့ဖို့မပါဘူးလို့ ကျောက်မြောင်း အရှေ့ရပ်ကွက် အုပ်ချုပ်ရေးမှူး ဦးဝေကျော်အောင်က ပြောပါတယ်။

ဧပြီ ၂၉ ဒီနေ့မနက်အထိ ကျန်းမာရေးဝန်ကြီးဌာနရဲ့ စာရင်းတွေအရ ရန်ကုန်တိုင်းထဲမှာဆိုရင် အင်းစိန်က ၂၃ ယောက်၊ တောင်ဥက္ကလာက ၁၃ ယောက်၊ မရမ်းကုန်းက ၁၂ ယောက်၊ ဗဟန်းက ကိုးယောက်၊ ပန်းဘဲတန်းနဲ့ တာမွေမြို့နယ်က ခုနှစ်ယောက်စီ၊ ဗိုလ်တထောင်နဲ့ လှိုင်သာယာမှာတော့ ငါးယောက်စီ၊ ကမာရွတ်က လေးယောက်၊ မင်္ဂလာဒုံနဲ့ ရွှေပြည်သာက သုံးယောက်စီ၊ မင်္ဂလာတောင်ညွန့်၊ စမ်းချောင်း၊ မြောက်ဥက္ကလာ၊ မြောက်ဒဂုံ၊ ဒေါပုံ၊ အရှေ့ဒဂုံ၊ သာကေတ၊ ကျောက်တံတား၊ လှိုင်မြို့နယ်တွေမှာ နှစ်ယောက်စီ၊ မှော်ဘီ၊ လှည်းကူး၊ အလုံ၊ ပုဇွန်တောင်၊ တောင်ဒဂုံ၊ သင်္ဃန်းကျွန်းနဲ့ ဒဂုံမြို့နယ်တွေမှာက တစ်ယောက်စီ ပိုးတွေ့လူနာရှိနေတာဖြစ်ပါတယ်။

တခြားမြို့နယ်တချို့မှာလည်း အလားတူ အခက်အခဲတွေ ကြုံနေရသူတွေလည်း ရှိပါတယ်။ ဒီကိစ္စတွေနဲ့ ပတ်သက်ပြီး ရန်ကုန်တိုင်းအစိုးရအဖွဲ့ လူမှုရေးဝန်ကြီး ဦးနိုင်ငံလင်းကို RFA က မေးမြန်းဖို့ကြိုးစားပေမယ့် ဆက်သွယ်လို့မရခဲ့ပါဘူး။ တိုင်းဒေသကြီးညွှန်ကြားချက်မရှိဘဲ ရပ်ကွက်အလိုက် အပိုင်းအလိုက် ပိတ်ဆို့တာတွေ၊ ကန့်သတ်တားဆီးတာတွေ မလုပ်ဖို့ ပြီးခဲ့တဲ့ဧပြီလ ၂ ရက် နေ့ရက်စွဲနဲ့ အစိုးရက ညွှန်ကြားချက် ထုတ်ထားပါတယ်။

#RFA