ပိဋိကတ်သုံးပုံကို အာဂုံဆောင်နိုင်သော သာသနာ့ အာဇာနည် အရှင်မြတ်တစ်ပါး ထပ်မံပေါ်ပေါက်

ပိဋိကတ်သုံးပုံကို အာဂုံဆောင်နိုင်သော (၁၅) ပါးမြောက် သာသနာ့ အာဇာနည် အရှင်မြတ်တစ်ပါး ထပ်မံပေါ်ပေါက်ခဲ့ကြောင်း ယနေ့ (ဇူလိုင် ၂၀ ရက်) တွင် ကျင်းပသည့် (၇၂)ကြိမ်မြောက်၊ တိပိဋကဓရ တိပိဋကကောဝိဒ ချီးကျူးပူဇော်ပွဲနှင့် အောင်လက်မှတ်ဆက်ကပ်လှူဒါန်းပွဲ အခမ်းအနားမှ သိရသည်။

ယနေ့နံနက် ၈ နာရီတွင် ရန်ကုန်မြို့ သီရိမင်္ဂလာကမ္ဘာအေးကုန်းမြေရှိ မဟာပါသာဏ လိုဏ်ဂူ သိမ်တော်ကြီး၌ ကျင်းပသည့် အဆိုပါအခမ်းအနားသို့ နိုင်ငံတော်သံဃမဟာနာယကအဖွဲ့ ဥက္ကဋ္ဌ ဗန်းမော်ကျောင်းတိုက်ဆရာတော် ဒေါက်တာဘဒ္ဒန္တ ကုမာရာဘိဝံသ အမှူးပြုသော ဆရာတော်ကြီးများ ကြွရောက်ချီးမြှင့်ခဲ့ပြီး နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တက်ရောက်ကြည်ညိုခဲ့သည်။

အခမ်းအနားတွင် ပိဋိကတ်သုံးပုံ အာဂုံဆောင်နိုင်ခဲ့သည့် တိပိဋကဓရ တိပိဋကကောဝိဒ ဘွဲ့တံဆိပ် တော်ရ ရန်ကုန်တိုင်းဒေသကြီး ဒဂုံမြို့သစ်(အရှေ့ပိုင်း)မြို့နယ် တိပိဋကမဟာဂန္ထဝင် နိကာယ် ကျောင်းတိုက်မှ အရှင်ပညာဝံသာဘိဝံသအား နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် က ဘွဲ့တံဆိပ်တော်နှင့် အောင်လက်မှတ်တို့ကို ဆက်ကပ်လှူဒါန်းခဲ့သည်။ အခမ်းအနားတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ယခုနှစ် ကျင်းပသည့် စာမေးပွဲကြီးတွင် တိပိဋကဓရ တိပိဋကကောဝိဒ သာသနာ့အာဇာနည် အရှင်မြတ်တစ်ပါးပေါ်ထွန်းခဲ့ပြီး ယခုလို ပူဇော်ခွင့်ရရှိ၍ ဂုဏ်ယူဝမ်းမြောက်လှကြောင်း လျှောက်ထားခဲ့သည်။

ဆက်လက်၍ ပိဋကတ် နှစ်ပုံခွဲ အာဂုံအောင် မူလအာဘိဓမ္မကဘွဲ့ရ တစ်ပါး၊ ပိဋကတ် နှစ်ပုံအောင် ဒီဃနိကာယကောဝိဒဘွဲ့ရ ၂ ပါး၊ ပိဋကတ် နှစ်ပုံ အာဂုံအောင် ဒီဃဘာဏကဘွဲ့ရ ၄ ပါး၊ ပိဋကတ် တစ်ပုံ ရေးဖြေအောင် ဝိနယကောဝိဒဘွဲ့ရ ၅ ပါး၊ ပိဋကတ် တစ်ပုံ အာဂုံအောင် ဝိနယဓရဘွဲ့ရ ၂၄ ပါး၊ ဝိနည်းပထမပိုင်း ရေးဖြေအောင် ဥဘတောဝိဘင်္ဂကောဝိဒဘွဲ့ရ ၉ ပါး၊ ဝိနည်းပထမပိုင်း အာဂုံအောပူင် ဥဘတောဝိဘင်္ဂဓရဘွဲ့ရ ၆၀ တို့ကိုလည်းဘွဲ့တံဆိပ်တော်နှင့် အောင်လက်မှတ်များ ဆက်ကပ်လှူဒါန်းခဲ့သည်။

မြန်မာနိုင်ငံ၏ လွတ်လပ်ရေးနှင့်အတူ ၁၉၄၈ ခုနှစ်တွင် တိပိဋကဓရ၊ တိပိဋကကောဝိဒ ရွေးချယ်ရေး စာမေးပွဲကြီး ပေါ်ပေါက်လာရခြင်းသည် ဆဋ္ဌသင်္ဂါယနာတင်ပွဲကျင်းပရာ၌ ပိဋက သုံးပုံ အာဂုံဆောင်သည့် သာသနာ့အာဇာနည်ပုဂ္ဂိုလ်များ ပေါ်ထွန်းလာစေရန် ရည်ရွယ်၍ ကျင်းပခဲ့ရာ စတင်ကျင်းပသည့် နှစ်မှ ယခုနှစ် (၇၂) ကြိမ်မြောက်အထိ နှစ်စဉ်မပျက်ကျင်းပခဲ့သည်။

နှစ်စဉ်တိုင်း မပျက်မကွက်ကျင်းပခဲ့သည်မှာ ၇၂ ကြိမ်ရှိပြီဖြစ်သော်လည်း ပထမဦးဆုံးအကြိမ် မင်းကွန်းဆရာတော်ကြီးမှစတင်ကာ သာသနာအာဇာနည် ၁၅ ပါးသာ ပေါ်ထွန်းသေးသည်မှာ ယခုစာမေးပွဲကြီး၏ ခက်ခဲနက်နဲမှုပင်ဖြစ်ကာ ယခုကဲ့သို့ တိပိဋကဓရ၊ တိပိဋကကောဝိဒ ဆရာတော်တပါးကိုထွက်ပေါ်သည်ကို ပူဇော်ခွင့်ရသည့်အတွက် အလွန်ပင် ဂုဏ်ယူဝမ်းမြောက်ခွင့်ရကြောင်း နိုင်ငံတော်၏ အတိုင်ပင်ခံက လျှောက်ထားသည်။

Credit

Facebook Comments

Burmese Online News