မြို့ရှောင်လမ်းဘေးရှိ လယ်ယာမြေများကို အိမ်ရာအဆောက်အအုံဆောက်လုပ်ဖို့အတွက် မဝယ်ကြရန်ဆောက်လုပ်ရေးဝန်ကြီးဌာနက သတိပေး

မြို့ရှောင်လမ်းဘေးရှိ လယ်ယာမြေများကိုအိမ်ရာအဆောက်အအုံဆောက်လုပ်ဖို့အတွက် မဝယ်ကြရန်ဆောက်လုပ်ရေးဝန်ကြီးဌာနဒုတိယဝန်ကြီး ဒေါက်တာဦးကျော်လင်းက ပြည်ထောင်စုလွှတ်တော်နာယကမှတစ်ဆင့် မေတ္တာရပ်ခံသတိပေးခဲ့သည်။ မြို့ရှောင်လမ်းဖောက်ပါက ခြံစည်းရိုးပါ တစ်ပါတည်းခတ်မည်ဖြစ်သဖြင့် စီးပွားရေးသမားများအနေဖြင့် မြို့ရှောင်လမ်းဘေးတစ်လျှောက်တွင်လယ်ယာမြေများကိုဝယ်ပြီး အဆောက်အအုံများဆောက်လုပ်ပါက မိမိတို့ငွေကြေးများသာ ဆုံးရှုံးသွားမည်ဖြစ်ကြောင်း ဒုဝန်ကြီးက သတိပေးထားသည်။

မြို့ရှောင်လမ်းများဖောက်လုပ်ခြင်းသည် မြို့တွင်းမှာရှိ စက်ဘီး၊ ဆိုက္ကား၊ လူစီးယာဉ်စသည်တို့နှင့် ယာဉ်မတော်တဆ ထိခိုက်မှုမဖြစ်စေရန်၊ မြို့ရှောင်လမ်းကို အသုံးပြုမည့်ခရီးသွားများ လိုရာခရီးကို အချိန်တိုအတွင်းရောက်ရှိနိုင်စေရန်အတွက် ရည်ရွယ် ဖောက်လုပ်ခြင်းဖြစ်ရာ စီးပွားရေးသမားများက အဆိုပါ လမ်းဘေးမှာရှိ လယ်ယာမြေများကို ဝယ်ပြီးတည်းခိုခန်းကြီးများ၊ စားသောက်ဆိုင်ကြီးများနှင့် အိမ်ရာအဆောက်အအုံများ ဆောက်လျှင် မြို့ရှောင်လမ်းသည်မြို့တွင်းလမ်းပြန်ဖြစ်သွားပြီး နောက်ထပ်မြို့ရှောင်လမ်း ထပ်ဖောက်ရမလိုဖြစ်နေခြင်းကြောင့်

နောင်တွင် မြို့ရှောင်လမ်းဖောက်လျှင် မြို့ရှောင်လမ်းတစ်လျှောက် ခြံစည်းရိုးခတ်မှာဖြစ်၍ အဆိုပါလမ်းဘေးရှိ မြေယာများကို ဝယ်ယူသူများအနေဖြင့် ငွေကြေးဆုံးရှုံးမှုများဖြစ်မည်ဖြစ်ကြောင်း၊ သက်ဆိုင်ရာ အစိုးရအဖွဲ့များကလည်း မြို့ရှောင်လမ်းဘေး အဆောက်အအုံဆောက်လုပ်ခြင်းကို ခွင့်မပြုဖို့ ဆောက်လုပ်ရေးဝန်ကြီးဌာန ဒုတိယဝန်ကြီးဒေါက်တာဦးကျော်လင်းက ပြည်ထောင်စု လွှတ်တော်နာယကကြီးမှတစ်ဆင့် မေတ္တာရပ်ခံခဲ့ခြင်းဖြစ်သည်။

Credit

Facebook Comments

Burmese Online News