ရန်ကုန်တိုင်းဒေသကြီးတွင် ယာဉ်ထိန်းရဲ ၁ ဦးလျှင် ခရီးသွားပြည်သူ ၈၀၀၀ ဦးနှုန်း ကြပ်မတ်ထိန်းသိမ်းပေးနေရကြောင်း ရန်ကုန်တိုင်းဒေသကြီးယာဉ်ထိန်းရဲတပ်ဖွဲ့မှ ရဲမှူးမျိုးမြင့်အောင်က ပြောသည်။

ရန်ကုန်မြို့၊ ၅၁ လမ်းရှိ ယာဉ်ထိန်းရဲတပ်ဖွဲ့စခန်းတွင် စက်တင်ဘာလ ၂၇ ရက်ကကျင်းပသော သတင်းစာရှင်းလင်းပွဲတွင် ယခုကဲ့သို့ပြောခြင်းဖြစ်သည်။

“ ရန်ကုန်တိုင်းဒေသကြီးမှာနေထိုင်တဲ့ပြည်သူက ၈ သန်းနဲ့ ၂ သိန်းကျော်လောက်ရှိပါတယ်။ ရန်ကုန်တိုင်းဒေသကြီးမှာ တာဝန်ယူဆောင်ရွက်နေတဲ့ယာဉ်ထိန်းရဲတပ်ဖွဲ့ဝင်က ၁၀၀၀ ခန့်ရှိတယ်။ ဒါကြောင့်မို့လို့ ခရီးသွားပြည်သူ ၈၀၀၀ ကိုယာဉ်ထိန်းရဲ ၁ ယောက်ထဲကနေ ကြပ်မတ် ထိန်းသိမ်းပေးနေရပါတယ်။ ဒီအချိုးဟာတော်တော်ကို မမျှတတဲ့အချိုးလို့လည်းပြောလို့ရပါတယ်။ နောက်မော်တော်ယာဉ်ပေါ့။ မော်တော်ယာဉ်ကရန်ကုန်တိုင်းဒေသကြီးမှာမှတ်ပုံတင်ထားတာ ကိုးသိန်းတစ်သောင်းနဲ့ငါးထောင်ကျော်ရှိတာပေါ့။ အဲဒါကိုယာဉ်ထိန်းရဲတပ်ဖွဲ့ဝင် ၁၀၀၀ နဲ့အချိုးချမယ်ဆိုရင် ယာဉ်ထိန်းရဲတပ်ဖွဲ့ဝင် ၁ ယောက်၊ မော်တော်ယာဉ် ကိုးရာတစ်ဆယ့်ငါးစီး၊ ခြောက်စီးလောက်ကို ထိန်းသိမ်းကြပ်မတ်နေရတာဖြစ်ပါတယ်’’ဟု ရန်ကုန်တိုင်းဒေသကြီးယာဉ်ထိန်းရဲတပ်ဖွဲ့မှ ရဲမှူးမျိုးမြင့်အောင်က ပြောသည်။

ရန်ကုန်တိုင်းဒေသကြီးတွင် ၂၀၁၉ ခုနှစ်၊ စက်တင်ဘာ ၁၃ ရက်မှ ၁၉ ရက်အထိယာဉ်တိုက်မှုပေါင်း ၃၀ မှုဖြစ်ပွားခဲ့ပြီး ၂၀ရ က်မှ ၂၆ ရက်အထိယာဉ်တိုက်မှု ၂၅ မှုဖြစ်ပွားခဲ့ကြောင်းသိရသည်။လက်ရှိတွင်ယာဉ်ကြောပိတ်ဆို့သောခရိုင်များကို မော်တော်ဆိုင်ကယ်များနှင့် ယာဉ်ထိန်းရဲများမှ လှည့်လည်ကာ ၁ ခရိုင်လျှင် မော်တော်ဆိုင်ကယ် ၁၀ စီးတစ်ဖွဲ့စီနှင့် ၂ ဖွဲ့စီ နေ့အလိုက် လိုက်လံရှင်းလင်းပေးနေကြောင်း သိရသည်။

Credit-အကုန်သိ

Facebook Comments